ឃុនបណ្ណានុរក្ស ប៊ូ ប៉ូរ
១ – ព្រះពុទ្ធវិបស្សី
រាប់អំពីភទ្ទកប្បនេះថយក្រោយទៅបាន ៩១ កប្ប ព្រះពុទ្ធវិបស្សីទ្រង់បានត្រាស់ក្នុងលោក ព្រះអង្គជាខត្តិយជាតិ ជាកោណ្ឌញ្ញគោត្រមានព្រះជន្ម ៨ ម៉ឺនឆ្នាំ ត្រាស់ក្រោមដើមបាដលិព្រឹក ( ដើមជ្រនៀង ) មានគូសាវកឈ្មោះខណ្ឌ១ តិស្ស១ មានសាវកសន្និបាត ៣ដង គឺសាវកសន្និបាតមានភិក្ខុ ៦លាន ៨សែនរូបម្ដង សាវកសន្និបាតមានភិក្ខុ ១សែនរូបម្ដង សាវកសន្និបាតមានភិក្ខុ ៨ ម៉ឺនរូបម្ដង សាវកសន្និបាតទាំង ៣ ដងនេះសុទ្ធតែជាព្រះខីណាស្រពទាំងអស់ មានភិក្ខុឈ្មោះអសោកជាឧបដ្ឋាក ព្រះបិតាជាព្រះរាជាទ្រង់ព្រះនាមពន្ធុមៈ ព្រះមាតាទ្រង់ព្រះនាមពន្ធុមតីជាព្រះជនេត្តី ( ព្រះមាតាបង្កើត ) នគរឈ្មោះពន្ធុមតី។
២ – ព្រះពុទ្ធសិខី
រាប់អំពីភទ្ទកប្បនេះថយក្រោយទៅបាន ៧១ កប្ប ព្រះពុទ្ធសិខីទ្រង់បានត្រាស់ក្នុងលោក ព្រះអង្គជាខត្តិយជាតិ ជាកោណ្ឌញ្ញគោត្រមានព្រះជន្មាយុ ៧ ម៉ឺនឆ្នាំ ត្រាស់ក្រោមដើមបុណ្ឌរិកព្រឹក្ស ( ដើមស្វាយស ) មានគូសាវកឈ្មោះអភិភូ ១ សម្ភវៈ ១ មានសាវកសន្និបាត ៣ ដង គឺមានភិក្ខុ ១ សែនរូបម្ដង មានភិក្ខុ ៨ ម៉ឺនរូបម្ដង មានភិក្ខុ ៧ ម៉ឺនរូបម្ដង សាវកសន្និបាតទាំង ៣ ដងនេះសុទ្ធតែជាព្រះខីណាស្រពទាំងអស់ មានភិក្ខុឈ្មោះខេមង្ករៈជាឧបដ្ឋាក ព្រះបិតាជាព្រះរាជាទ្រង់ព្រះនាមអរុណ ព្រះមាតាទ្រង់ព្រះនាមបភាវតី ជាព្រះជនេត្តី នគរឈ្មោះអរុណវតី។
៣ – ព្រះពុទ្ធវេស្សភូ
រាប់អំពីភទ្ទកប្បនេះថយក្រោយទៅបាន ៣១ កប្ប ព្រះពុទ្ធវេស្សភូ ទ្រង់បានត្រាស់ក្នុងលោក ព្រះអង្គជាខត្តិយជាតិ ជាកោណ្ឌញ្ញគោត្រមានព្រះជន្មាយុ ៦ ម៉ឺនឆ្នាំ ត្រាស់ក្រោមដើមសាលព្រឹក្ស ( ដើមរាំងភ្នំ ) មានគូសាវកឈ្មោះសោនៈ ១ ឧត្ដរៈ ១ មានសាវកសន្និបាត ៣ ដង គឺមានភិក្ខុ ៨ ម៉ឺនរូបម្ដង មានភិក្ខុ ៧ ម៉ឺនរូបម្ដង មានភិក្ខុ ៦ ម៉ឺនរូបម្ដង សាវកសន្និបាតទាំង ៣ ដងនេះ សុទ្ធតែជាព្រះខីណាស្រពទាំងអស់ មានភិក្ខុឈ្មោះឧបសន្តៈ ជាឧបដ្ឋាក ព្រះបិតាជាព្រះរាជាទ្រង់ព្រះនាមសុប្បតីតៈ ព្រះមាតាទ្រង់ព្រះនាមយសវតី ជាព្រះជនេត្តី នគរឈ្មោះអនោមៈ។
៤ – ព្រះពុទ្ធកកុសន្ធ
ក្នុងភទ្ទកប្បនេះ ព្រះពុទ្ធកកុសន្ធបានត្រាស់ក្នុងលោក ព្រះអង្គជាព្រាហ្មណជាតិ ជាកស្សបគោត្រ មានព្រះជន្មាយុ ៤ ម៉ឺនឆ្នាំ ត្រាស់ក្រោមដើមសិរីសព្រឹក្ស ( ដើមច្រេស ) មានគូសាវកឈ្មោះវិធូរៈ ១ សញ្ញីវៈ ១ មានសាវកសន្និបាតតែម្ដង មានភិក្ខុ ៤ ម៉ឺនរូប សុទ្ធតែជាព្រះខីណា ស្រពទាំងអស់ មានភិក្ខុឈ្មោះវុឌ្ឍិជៈជាឧបដ្ឋាក ព្រះបិតាជាព្រាហ្មណ៍ នាមអគ្គិទត្ត ព្រះមាតាជាព្រហ្មណីនាមវិសាខា ជាព្រះជនេត្តី សម័យនោះ មានព្រះរាជាព្រះនាមខេមៈ នគរឈ្មោះខេមវតី។
៥ – ព្រះពុទ្ធកោនាគមន
ក្នុងភទ្ទកប្បនេះ ព្រះពុទ្ធកោនាគមនបានត្រាស់ក្នុងលោក ព្រះអង្គជាព្រាហ្មណីជាតិ ជាកស្សបគោត្រ មានព្រះជន្មាយុ ៣ ម៉ឺនឆ្នាំ ត្រាស់ក្រោមដើមឧទុម្ពរព្រឹក្ស ( ដើមល្វា ) មានគូសាវកឈ្មោះភិយ្យោសៈ ១ ឧត្ដរៈ ១ មានសាវកសន្និបាតតែម្ដង មានភិក្ខុ ៣ ម៉ឺនរូប សុទ្ធតែជាព្រះខីណាស្រពទាំងអស់ មានភិក្ខុឈ្មោះសោត្ថិជៈ ជាឧបដ្ឋាក ព្រះបិតាជាព្រហ្មណ៍នាមយញ្ញទត្ត ព្រះមាតាជាព្រហ្មណីនាមឧត្ដរា ជាព្រះជនេត្តី សម័យនោះ មានព្រះរាជាព្រះនាមសោភៈ នគរឈ្មោះសោភវតី។
៦ – ព្រះពុទ្ធកស្សប
ក្នុងភទ្ទកប្បនេះ ព្រះពុទ្ធកស្សបបានត្រាស់ក្នុងលោក ព្រះអង្គជាព្រាហ្មណីជាតិ ជាកស្សបគោត្រ មានព្រះជន្មាយុ ២ ម៉ឺនឆ្នាំ ត្រាស់ក្រោមដើមនិគ្រោធព្រឹក្ស ( ដើមជ្រៃ ) មានគូសាវកឈ្មោះតិស្សៈ ១ ភារទ្វាជៈ ១ មានសាវកសន្និបាតតែម្ដង មានភិក្ខុ ២ ម៉ឺនរូប សុទ្ធតែជាព្រះខីណាស្រពទាំងអស់ មានភិក្ខុឈ្មោះសព្វមិត្តជាឧបដ្ឋាក ព្រះបិតាជាព្រហ្មណ៍នាមព្រហ្មទត្ត ព្រះមាតាជាព្រហ្មណីនាមធនវតី ជាព្រះជនេត្តី សម័យនោះ មានព្រះរាជាព្រះនាមគឹកី នគរឈ្មោះពារាណសី។
៧ – ព្រះពុទ្ធគោតម
ក្នុងភទ្ទកប្បនេះ ព្រះពុទ្ធគោតមបានត្រាស់ក្នុងលោក ព្រះអង្គជាខត្តិយជាតិ ជាគោតមគោត្រ មានព្រះជន្មាយុ ៨០ ឆ្នាំ ត្រាស់ក្រោមដើមអស្សត្ថព្រឹក្ស ( ដើមពោធិបាយ ) មានគូសាវកឈ្មោះសារីបុត្ត ១ មោគ្គល្លាន ១ មានសាវកសន្និបាតតែម្ដង មានភិក្ខុ ១ ពាន់ ២ រយ ៥០ រូប សុទ្ធតែជាព្រះខីណាស្រពទាំងអស់ មានភិក្ខុឈ្មោះអានន្ទជាឧបដ្ឋាក ព្រះបិតាជាព្រះរាជាទ្រង់ព្រះនាមសុទ្ធោទនៈ ព្រះមាតាទ្រង់ព្រះនាមមហាមាយា ជាព្រះជនេត្តី ព្រះនគរឈ្មោះកបិលវត្ថុ។
ចប់
ស្រង់មកអំពីសៀវភៅព្រះត្រៃបិដកខ្មែរ ភាគទី ១៦ ត្រង់មហាបទានសូត្រទំព័រ ២៥ ….។
ប្រភព ៖ ទស្សនាវដ្ដីកម្ពុជសុរិយា អត្ថបទក្បាលទី១ ឆ្នាំទី១៧ ខ្សែទី២ គ.ស.១៩៤៥ – ព.ស.២៤៨៥
